a waukrife minnie
    whare are you gaun, my bonie lass,
    whare are you gaun, my hinnie?
    she answered me right saucilie,
    “an errand for my minnie.”
    o whare live ye, my bonie lass,
    o whare live ye, my hinnie?
    “by yon burnside, gin ye maun ken,
    in a wee house wi' my minnie.”
    but i foor up the glen at e'en.
    to see my bonie lassie;
    and lang before the grey morn cam,
    she was na hauf sae saucie.
    o weary fa' the waukrife cock,
    and the foumart lay his crawin!
    he wauken'd the auld wife frae her sleep,
    a wee blink or the dawin.
    an angry wife i wat she raise,
    and o'er the bed she brocht her;
    and wi' a meikle hazel rung
    she made her a weel-pay'd dochter.
    o fare thee weel, my bonie lass,
    o fare thee well, my hinnie!
    thou art a gay an' a bonnie lass,
    but thou has a waukrife minnie.